فضفضة

ساعدوني: كيف بدي أبعد هالبنت عني ؟

السلام عليكم ورحمة الله وبركاته انا بنت عمري 17 سنة بالثانوية انا بعاني من بنت ملزقة فيي ( بكل معنى الكلمة ! ) وبصراحة هي البنت مريضة نفسيا لدرجة رهيبة !

هذه هي القصة ؟

لما كنت بالصف التاسع كانت تحاول تقرب مني انا وصاحبتي، بس ما قدرت، وهي كانت ملتهية مع بنت تظل تمشي معها … المهم لما جينا ننتقل من المدرسة الاعدادية ، صارت بدها تنتقل معنا ، وعلى صفنا ، وتقعد جمبنا ، وكانت تحكيلنا : اه انا ليش جاية على هاي المدرسة الا مشانكن ؟ دخلنا صف عاشر وبدت تفرض نفسها علينا شوي شوي ، وتضل معنا بالفرصة ، واذا في عزومة عيد ميلاد او اشي لازم هي تكون موجودة ، وبصراحة احنا مش طايقينها، وحيات الله عقلها عقل بنت 7 سنين !

فش كلمة مليحة بتطلع من ثمها ، خجولة جدا، تافهة ، يعني هي البنت زي مبقولوها (هبلة ) ! فش الها لا رأي ولا شخصية ، كلشي زينا انا وصاحبتي شو ما نعمل ، بناخد رأيها ، قال خلص زيكم ، بنروح نشتري اشياء وعصير،قال خلص زينا بتشتري ، وغيرها عندها غيرة قاتلة ! كانت توكل حالها اكل من الغيرة لما تشوفني انا وصاحبتي بنحكي مع بعض او قاعدين جمب بعض ، وقال شو بقيتو تحكو يلا احكولي ، اكيد عليي ومبعرف ايش ، والله قرفتنا هالبنت يا عالم ! ولا غير هيك مجننتنا عالنت وعالفيس كمان لاحقتنا.

لما دخلنا الثانوية كان لازم نفترق ( ويا الله شو كنت مبسوطة انا من هالشغلة ) هسة انا وصاحبتي دخلنا على فرع وهي راحت فرع ثاني.

وكانت طول الوقت بتاكل حالها من الغيرة ، قال تنبسط لما احكيلها اني مش فاضية اشوف صاحبتي او نحكي مع بعض من ضغط الدراسة ، وتخيلو المصيبة كانت هي تروح قبلنا بحصة يعني حوالي اربعين دقيقة هي صفها قريب عصفنا وقال بدل ما تروح على دارها ، تجي تستنانا 40 دقيقة تحت الشمس ! قال عشان تروح معنا! واحنا مش طايقينها دخيل الله لاحقتنا وين ما نروح.

حتى لما طلعنا رحلة اتصلت يمكن 5 او 6 مرات عشان تعرف شو بنعمل وكانت مقهورة ، حتى هي قال ما راحت عالرحلة الي عملها صفهم لانه احنا مش معها.

الأمور زادت عن حدها كتير كيف انا بدي ابعدها عني؟ خاصة انه انا بدي أحول تخصصي ولازم اروح على صفها ، وهذه مصيبة وهاملة همها ! والله لو في كلمة مليحة بتحكيها بنقول اه ، بس البنت لا امل منها ، حاولت اغيرها ، بس لا حياة لمن تنادي قولولي طريقة ابعدها عني من غير ما اجرحها :((

وشكرا كثير الكم يمكن طولت عليكم

‫2 تعليقات

  1. انا شاعر فيك بكتلي صاحبة هيك الحل الوحيد هو انك تصارحيها بمشاعرك بس شوي شوي يعني حاولي قد ما تقدري تعاملي معها بليونة وفهميها انكن مش ملائمات لبعض بعدين اذا هي بعقل 7 سنين تعاملي معها على هاد الاساس ….غير هيك انتي خايفة تجرحي مشاعرها بس بنفس الوقت انتي بتضيعي وبتخسري بمستقبلك وحريتك -in order of some people to win others have to lose that’s how life goes

  2. اقعدين مع البنت حاولين تفهمنها وتفهمن عليها وساعدينها هي معتبري انكن انتن اعز صديقاتها وبدها تكون مثلكن حرام ادشروها لحالها اكسبو فيها ثواب حتئ ولو على حساب شويه حريتكن

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *